Forsíðan á Fréttablaðinu í morgun

.... miðað við fyrirsögnina þá er hafið stríð.

Álverinu í Straumsvík lokað ef ekki verður af stækkun

Ég hef þó lesið það einhversstaðar, haft eftir forsvarsmönnum álversins, að það standi ekki til að loka því þó það verði ekki stækkað.   En það selur nú ekki.  

19 janúar 2007

Endurskrifið dagbækurnar ykkar 
Það er 19 janúar sem blívur en ekki átjándi

Fullt af slóðum....hér...og...hér

18 janúar 2007

Loksins.

Allt um myndina hér.

Upp með sokkana

Veðrið er ótrúlegt.  Við Kristín fórum í röskan göngutúr nú í kvöld.  Það er logn og hiti við frostmark.  Norðurljósin í öllu sínu veldi og stjörnurnar.  Gerist ekki betra.

Eftir rúma viku ætla Þórólfar að hittast og byrja að plana og hugsa um ferðir sem verða farnar í sumar.  Ég er með nokkrar hugmyndir að stuttum en skemmtilegum ferðum.  Hef verið að lesa Bíl og bakpoka eftir Pál Ásgeir.  Stefnum á Esjugöngu og hitting í kjölfar hittingsins.  Ég hlakka til.

 

Humm

Skaupið... já Skaupið.

Svo kom nýtt ár

GLEÐILEGT ÁR KÆRU VINIR 
TAKK FYRIR ÁRIÐ SEM ER A LÍÐA
VONANDI VERÐUR ÁRIÐ 2007 OKKUR FARSÆLT OG GOTT

 

Stækkun álversins í Straumsvík - NEI TAKK

Tíu rök gegn stækkun álversins í Straumsvík

1. Loftmengun
Frábær árangur í baráttunni við loftmengun í Straumsvík síðustu 20 árin verður að engu við stækkun.

2. Sjónmengun
Lóðin eftir stækkun verður jafn breið og hún er löng í dag. Línumannvikri vegna stækkunar á útivistarsvæði Hafnfirðinga og í nágrenni við íbúabyggð eru óásættanleg

3. Mengunarsvæði
Byggingarland okkar Hafnfirðinga er takmarkað. Í framtíðinni þurfum við að fá Straumsvíkursvæðið og 10 ferkílómetra mengunarsvæði álverkssmiðjunnar undir blandaða íbúðabyggð, iðnað, verslun og þjónustu. Með því að stækka álbræðsluna núna eyðileggjum við framtíðartækifæri okkar.

4. Samfélagsmál
Við erum ekki lengur fátækur útgerðarbær, við búum ekki við atvinnuleysi, við eigum ekki ótakmarkað land og við reiknum ekki með að börnin okkar vilji vinna í álbræðslu. Við erfum ekki landið frá foreldrum okkar, við fáum það að láni hjá börnunum okkar

5. Fjármál
Allt byggt land í Hafnarfirði í dag er 12 ferkílómetrar. Við stækkun skuldbindum við 10 ferkílómetra byggingarlands undir mengunarsvæði um ókomna framtíð. Í stækkunarhugmyndunum er ekki gert ráð fyrir krónu til okkar Hafnfirðinga fyrir þessa fórn. Óljós loforð um greiðslur fyrir fasteignagjöld og hafnarnotkun koma ekki í staðin fyrir hana.

6. Atvinnumál
Stækkun álbræðslunnar hefur engin úrslitaáhrif fyrir atvinnulíf í Hafnarfirði. Í dag vinna 230 Hafnfirðingar hjá álverkssmiðjunni . Í Hafnarfirði hefur störfum fjölgað undanfarin 7 ár um 240 störf á ári án þess að álbræðslan í Straumsvík hafi stækkað.

7. Virkjunarmál
Stækkun kallar á virkjun neðri hluta Þjórsár og hefur óafturkræfar afleiðingar fyrir náttúru Íslands.

8. Byggðaþróun
Innan fárra ára verður Straumsvíkursvæðið eitt það verðmætasta á höfuðborgarsvæðinu með tilliti til staðsetningar. Nágrenni við höfuðborgina og nágrenni við alþjóðaflugvöllinn gerir þetta landssvæði eftirsóknarvert fyrir hátækni- og sprotafyrirtæki. Mengunarsvæðið takmarkar eðlilega byggðaþróun í Hafnarfirði.

9. Ábati fyrir íslenskt samfélag
“Jafnvel þó að Íslendingar kæmust í hóp stærstu álframleiðenda heims og myndu virkja alla hagkvæmustu virkjunarkosti landsins, myndi arðsemi þess og hagur fyrir íslenskt samfélag aldrei verða meiri en sem nemur framlagi eins öflugs útrásarfyrirtækis” (Ágúst Guðmundsson, Bakkavör, febrúar 2006).

10. Loftslagsbreytingar
Í starfsleyfinu er engin takmörkun á útblæstri gróðurhúsaloftegunda sem valda loftlagsbreytingum sem eru alvarlegasta umhverfisvandamál í heiminum í dag

Af heimasíðu Sólar í Straumi.

Jólin í stuttu máli

Jólin okkar voru góð.  Aðfangadagskvöld var hefðbundið.  Eftir pakka og nokkur þakkarsímtöl röltum við okkur yfir til mömmu.  Sátum og spjölluðum þar í smá stund og stungum okkur svo aftur heim og höfðum það gott.  Í gær, jóladag, sváfum við vel út.  Fórum svo seinnipartinn í hangikjötið á Stokkseyri.  Það var gott. 

Í dag var annaníjólumganga Þórólfs.  Helgafellið líkt og svo oft áður.  Notaði tækifærið og prufaði nýja GPS tækið sem mín elskuleg var svo góð að gefa mér í jólaogafmælisgjöf.  Var reyndar ekki búinn að setja kortið í tækið, en engu að síður varð ég að reyna græjuna.  Ekkert smá ánægður með stykkið.  Eftir gönguna var farið til mömmu á Hringbrautina.  Gengum í kring um jólatré og snarbilaður jólasveinn kíkti í heimsókn.  Spurning af hvaða deild hann hafi stungið af.

Vinna á morgun.  Mikið að gera.

Jólakveðja

Kæru vinir, mínar bestu óskir um gleðileg jól.
Vona að þið hafið það sem allra best yfir hátíðarnar.

Góður dagur

Þorláksmessa er einn af þessum dögum sem geta verið skrítinir og skemmtilegir en líka undirlagðir af stressi og leiðindum.  Dagurinn í dag var frábær.  Ekki til stress né læti í okkur Sunnuvegsbúum.  Dóluðum okkur fram eftir degi við tiltekt og snurfuss, kíktum aðeins niður í bæ og til mömmu.  Allt í göngufæri.  Svo seinnipartinn var strikið tekið til Regínu frænku í árlegt Þorláksmessuboð hennar.  Eins og vanalega var það dásamlegt.  Takk fyrir okkur.  Sit núna og sýð hangikjötið, grauturinn kominn út í kælingu og karamellusósan klár í ísskápnum. 

Munum eftir að gefa fuglunum brauðbita.