Og áfram skal haldið

Þetta er búið að vera fínasta helgi.  Eftir vinnu á föstudeginum skellti ég mér í ræktina og puðaði þar í dágóðan tíma.  Það virkar sem vítamínsprauta að fara eftir vinnu og hamast og pumpa almennilega.  Þegar heim var komið fengum við Kristín okkur súpu og brauð og spjölluðum fram eftir kvöldi. 

Á laugadagsmorgninum var ég vaknaður fyrir níu.  Nokkrir almennilegir Þórólfar voru búnir að ákveða að skella sér á Helgafellið.  Og það gerðum við.  Það var -16°C þegar við lögðum í'ann.  Drullu kalt en við gengum rösklega til að koma hita í okkur.  Það var fallegt á toppnum - horfa yfir höfðuborgarsvæðið.  Fyrst ég fór í þessa göngu nennti ég ekki á æfingu.

Þegar ég kom svo heim skaust Kristín og sótti Mánann í Kópavoginn og kom honum á fótboltaæfingu.  Eftir hana snudduðumst við aðeins í bænum gerðum það sem þurfti að gera.

Um kvöldið skelltum við okkur í leikhús og sáum Amadeus í Borgarleikhúsinu.  Það var ágætt.  Pínulítið of langt.  En svona á heildina litið bara nokkuð gott.  Hilmir Snær alveg að gera það í hlutverki Salieris.  Náði að halda stykkinu uppi.

Við fengum okkur svo bara pizzu og rauðvín eftir leikhús.

Svo í dag var vetur.  Við mokuðum, snjóhreinsuðum bílinn og fórum í langan göngutúr.  Svona eiga góðar helgar að vera.

á ég eða á ég ekki?

Í þrjú ár hefi ég bloggað nokkuð reglulega í blogdrive kerfinu.  Það var ömurlegt.  Þar áður bloggaði ég á folk.is, það var hræðilega rólegt kerfi.  Gafst upp á því.  Og fyrir það var ég að möglast við þetta á blogspot.  Nú er ég hér, í bili að minnsta kosti.  Kannski verður þetta síðasta lending fyrir www.heidarbirnirkristjánsson.is.  Heimsyfirráð eða dauði og allt það.  En þetta lítur vel út.