Stækkun álversins í Straumsvík - NEI TAKK

Tíu rök gegn stækkun álversins í Straumsvík

1. Loftmengun
Frábær árangur í baráttunni við loftmengun í Straumsvík síðustu 20 árin verður að engu við stækkun.

2. Sjónmengun
Lóðin eftir stækkun verður jafn breið og hún er löng í dag. Línumannvikri vegna stækkunar á útivistarsvæði Hafnfirðinga og í nágrenni við íbúabyggð eru óásættanleg

3. Mengunarsvæði
Byggingarland okkar Hafnfirðinga er takmarkað. Í framtíðinni þurfum við að fá Straumsvíkursvæðið og 10 ferkílómetra mengunarsvæði álverkssmiðjunnar undir blandaða íbúðabyggð, iðnað, verslun og þjónustu. Með því að stækka álbræðsluna núna eyðileggjum við framtíðartækifæri okkar.

4. Samfélagsmál
Við erum ekki lengur fátækur útgerðarbær, við búum ekki við atvinnuleysi, við eigum ekki ótakmarkað land og við reiknum ekki með að börnin okkar vilji vinna í álbræðslu. Við erfum ekki landið frá foreldrum okkar, við fáum það að láni hjá börnunum okkar

5. Fjármál
Allt byggt land í Hafnarfirði í dag er 12 ferkílómetrar. Við stækkun skuldbindum við 10 ferkílómetra byggingarlands undir mengunarsvæði um ókomna framtíð. Í stækkunarhugmyndunum er ekki gert ráð fyrir krónu til okkar Hafnfirðinga fyrir þessa fórn. Óljós loforð um greiðslur fyrir fasteignagjöld og hafnarnotkun koma ekki í staðin fyrir hana.

6. Atvinnumál
Stækkun álbræðslunnar hefur engin úrslitaáhrif fyrir atvinnulíf í Hafnarfirði. Í dag vinna 230 Hafnfirðingar hjá álverkssmiðjunni . Í Hafnarfirði hefur störfum fjölgað undanfarin 7 ár um 240 störf á ári án þess að álbræðslan í Straumsvík hafi stækkað.

7. Virkjunarmál
Stækkun kallar á virkjun neðri hluta Þjórsár og hefur óafturkræfar afleiðingar fyrir náttúru Íslands.

8. Byggðaþróun
Innan fárra ára verður Straumsvíkursvæðið eitt það verðmætasta á höfuðborgarsvæðinu með tilliti til staðsetningar. Nágrenni við höfuðborgina og nágrenni við alþjóðaflugvöllinn gerir þetta landssvæði eftirsóknarvert fyrir hátækni- og sprotafyrirtæki. Mengunarsvæðið takmarkar eðlilega byggðaþróun í Hafnarfirði.

9. Ábati fyrir íslenskt samfélag
“Jafnvel þó að Íslendingar kæmust í hóp stærstu álframleiðenda heims og myndu virkja alla hagkvæmustu virkjunarkosti landsins, myndi arðsemi þess og hagur fyrir íslenskt samfélag aldrei verða meiri en sem nemur framlagi eins öflugs útrásarfyrirtækis” (Ágúst Guðmundsson, Bakkavör, febrúar 2006).

10. Loftslagsbreytingar
Í starfsleyfinu er engin takmörkun á útblæstri gróðurhúsaloftegunda sem valda loftlagsbreytingum sem eru alvarlegasta umhverfisvandamál í heiminum í dag

Af heimasíðu Sólar í Straumi.

Athugasemdir

[Karl Ágúst Ipsen (IP-tala skráð) 29.12.2006 kl. 10:16]

Hafði geisladiskurinn með Bo ekki tilætluð áhrif á þig? Eða ertu svona reiður af því þú fékkst hann ekki?

 Annars hef ég ekki kynnt mér þessa stækkun álversins neitt en það er óumdeilt að Alcan hefur gert góða hluti fyrir Reykjavík. Ég hef heldur ekki heyrt annað en að umhverfismál í kringum álverið séu bara í alveg hreint ágætu standi. Hversvegna segja menn því í lið 1 að þessi árangur verði að engu? Afhverju ætti fyrirtækið að slaka á kröfum bara af því þeir stækkuðu?

Og hver vill búa þarna þar sem álverið er í dag? Veit ekki betur en önnur hver íbúð á Völlunum standi tóm, á lækkuðu verði og séu illseljanlegar. Afhverju vilja menn þá byggja meira þarna?

[Karl Ágúst Ipsen (IP-tala skráð) 29.12.2006 kl. 10:17]

Reykjavík í textanum átti auðvitað að vera Hafnarfjörður. Assgið!

[Heiðar Birnir, 29.12.2006 kl. 12:07]

Ég fékk diskinn.  Hver veit hvort ég skili honum... hann dugar allavegana ekki fyrir atkvæðinu

Tjah... er verið að tala um að slakað verði á kröfunum í lið 1?  held ekki, en þegar verið er að stækka verksmiðjuna um meira en helming þá gefur það auga leið að menguninn kemur til með að aukast.  Þess vegna verður árangurinn að engu.

Getur verið að ein ástæðan fyrir því að önnur hver íbúð á Völlunum sé auð og illseljanleg sé vegna nálægðar við álverið?  Í þau skipti sem ég hef rúntað um Vellina finnst mér útsýnið yfir álverið og nálægðin við háspennumöstrin sem þar eru lítið spennandi nágrannar.

[Karl Ágúst Ipsen (IP-tala skráð) 29.12.2006 kl. 13:20]

Hvort kom á undan - hænan eða eggið? Er ekki Álverið búið að vera þarna í áratugi? Ég held hreinlega að álverið sé ekki ástæðan fyrir því að enginn vilji búa á völlunum heldur miklu fremur fjarlægðin við byggð ból og sú að hverfið er illa skipulögð hringtorgavitleysa.

Jájá - annars hefði ég aldrei trúað því að ég yrði talsmaður stóriðju. Hvert mál verður þó að skoða fyrir sig - maður getur ekki verið á móti álverum bara af því það heitir álver og maður getur ekki verið á móti virkjunum bara af því það er virkjun. Ég er miklu mun óánægðari með stækkun járnblendiverksmiðjunnar á Grundartanga enda er þar um einhverja sóðalegustu verksmiðju á byggðu bóli að ræða og mengunin þaðan margföld á við álverið í Straumsvík. Afhverju nennir fólk ekki að rífast yfir því? Skyldi það vera af því það er ekkert kaffihús nálægt?

[Heiðar Birnir, 29.12.2006 kl. 14:59]

Líkt og í öllu þá kom hænan á undan. 

Þar sem skortur er á lóðum í Hafnarfirði þá var ekki um annað land að ræða heldur en Vellina.  Það var náttúrulega hafist handa við að skipuleggja (vissulega með miður góðum árángri sbr. öll hringtorgin).  Húsin risu, en það vantar kaupendur og ein af ástæðunum er álverið, og kannski frekar, fyrirliggjandi stækkun þess.  Að minnsta kosti heyrir maður það frá íbúum þar.

Álverið eins og það er, er bara alveg ágætt út af fyrir sig.  Ég hef lítið á móti því - en ég er á móti stækuninni. 

Ég held að fæstir séu á móti virkjunum bara til að vera á móti slíku.  En spurningin er einföld.  Hvernig viljum við forgangsraða hlutunum.  Á hverju viljum við lifa.

Ég er hjartanlega sammála þér varðandi járnblendiverksmiðjuna.  Ef ég man rétt þá hefur verið tekið almennilegt rúss varðandi það.  Hvert atriði verður að hafa sinn tíma.  Núna er fókusinn á Straumsvík.