Bölvar og ragnar - bölv og ragn

Fátt er eins hressandi og almennilegt bölv.  Helvítis djöfulsins andskotans fávita sauðurinn þinn, notaði maður oft þegar maður vildi leggja áherslu á orð sín.  Oftar en ekki var lítil meining á bakvið þetta en þetta þótt ógurlega töff. 

Tinnabækurnar voru og eru góð uppspretta sæmilegasta bölvs.  Kolbeinn átti það til að súrra saman fagursköpuðu bölvi sem fylltu heilu myndarammana.  Þetta var svo magnað að maður fell nánast í stafi við það eitt að lesa ósköpin.   

Í dag er maður frekar hógvær í þessu öllu saman.  Eitt og eitt “fuck” læðist út úr manni ásamt “shit-i” annað slagið.  Ég hef ekki ekki náð að verða mikið svona erlendis í bölvi og þaðan af síður tekið upp á því að þýða útlenskt (enskt) blót yfir á ástkæra.  Þetta útlenska bölv, sem ég heyri, er í amrískum bíómyndum og þáttum.  Það er ósköp fátæklegt og einfalt.  Það samanstendur af þessu dæmigerða “fuck” og “shit” og er notað í óhófi, ásamt því að þau eru hnýtt við önnur orð svo sem, “holy“, “asshole” og svo framvegis.  Við það að snúa þessu yfir á íslenskuna missir þetta einhvernvegin allan brodd.  Heilagur kúkur hljómar ekkert sérlega vel hvað þá heilög serðing, þetta er bara asnalegt.   

Því miður virðist það vera að í stað þess að læra að bölva sæmilega á íslensku og gefa þannig orðum sínum aukna merkingu nota krakkar “fuck” og “shit” í tíma og ótíma ásamt því að ofnota orðið “semi”(hálf, lítið, smá) samanber að vera semi svangur, semi syfjaður nú eða semi góður í fótbolta.  Frekar dapurt. 

Shiturinn titturinn er eina samsetningin sem ég man eftir þar sem útlenska og íslenska er hnýtt saman.   Útlenska með íslenskum greini og íslensku endaorði.  Samt frekar semi dapurt einhvernvegin.

Athugasemdir

[Gulli litli, 29.10.2007 kl. 13:13]

Fari það svoleiðis beinustu leið til helv... Þekki vel þennan Bölvar en hver er þessi Ragnar?

[Heiðar Birnir, 29.10.2007 kl. 13:59]

Tilvitnun í Heilsubælið þar voru bræður, annar bölvar en hinn ragnar... ef ég man rétt.

[Hulla (IP-tala skráð) 30.10.2007 kl. 21:06]

Notar engin "demIT" nema ég???
Ég er bara búin að reyna að losna við það í langan tíma en það er bara fast við mig, og djövlinn, Ekki töff en ávanabindandi.

Ha det godt. Hulla

[Birgitta (IP-tala skráð) 30.10.2007 kl. 21:30]

Ég er nú að reyna að tileinka mér mildari útgáfu af bölvi Kolbeins Kafteins en það gengur erfiðlega.   " syndandi smokkfiskar"  "heiðgular halakörtur"   "fjólubláar flyðrur frá Fárskrúðsfirði"      Einhverra hluta vegna missir þetta marks.....................

[Svilinn (IP-tala skráð) 1.11.2007 kl. 11:37]

verð að taka það fram að kolbeinn Kafteinn notaði setninguna "fimmtán flakaðar flyðrur frá Fárskrúðsfirði" í bókinni Kolafarmurinn.