Staðfesti erlendar skuldbindingar

Staðfesti erlendar skuldbindingar

Davíð Oddson fyrrverandi Seðlabankastjóri staðfesti ábyrgð Íslendinga á innistæðutryggingum tæpum mánuði eftir að hann gagnrýndi stjórnvöld hér harkalega fyrir ætla að taka á sig skuldbindingar. Gagnrýni Davíðs kom fram í bréfi hans til Geirs Haarde, þáverandi forsætisráðherra.

Að því er fram kemur í sunnudagsblaði Morgunblaðsins, þá sendi Davíð oddsson þann 22. október í fyrra bréf til Geirs Haarde, þar sem Davíð segir: „Er það virkilega svo að íslensk stjórnvöld ætli án lagaheimildar að taka á sig stórkostlegar erlendar skuldbindingar að kröfu Breta og fleiri?"  Ennfremur segir í bréfinu: „Þetta eru ekki skuldbindingar íslenskra borgara, þetta eru skuldir Landsbankans."

En tæpum mánuði síðar, 19 nóvember, skrifaði Davíð undir orðalag í 9. grein viljayfirlýsingar íslenskra stjórnvalda til Alþjóðagjaldeyrissjóðsins, þar sem hert var á orðalagi, því heitið að virða skuldbindingar á grundvelli innistæðutryggingakerfisins gagnvart öllum tryggðum innlánshöfum. Þetta herta orðalag var, samkvæmt upplýsingum fréttastofu, tekið upp til að tryggja afgreiðslu Alþjóðagjaldeyrissjóðsins á aðstoð fyrir íslendinga.

Davíð hefur ítrekað sagst hafa varað við því sem gæti gerst í íslensku efnahagslífi.

Í febrúar í fyrra áttu fulltrúar frá Seðlabankanum fundi í London með forsvarmönnum nokkurra stórra banka í Evrópu og forstjóra Moodys í Evrópu og Asíu. Þar lýsti Moodys yfir miklum áhyggjum af bönkunum en þó mest af Landsbankanum og hve hinn mikli innlánsreikningur Icesave kunni að vera kvikur og háður trausti og trúnaði á markaði og ekki aðeins trausti Landsbankans heldur á íslandi og íslenska bankakerfinu. Þetta segir í minnisblaði Seðlabankans frá fundunum. Í minnisblaðinu segir einnig að Seðlabankamenn hafi farið yfir þau rök sem væru gegn því að þessi innlánsreikningur væri jafn ótraustur og Moody‘s hefði áhyggjur af, en ekki sé líklegt að öllum efasemdum þeirra hafi verið eytt segir í bréfinu.

Í minnisblaði Seðlabankans eftir fundi í Lundúnum í febrúar í fyrra segir m.a. að íslensku bankarnir, Kaupþing og Glitnir alveg sérstaklega hafa stefnt sér og það sem verra er, íslensku fjármálalífi í mikla hættu, jafnvel í hreinar ógöngur, með ábyrgðalausri framgöngu á undanförnum árum. Hættulegt sé að hafast ekkert að í þeirri von að markaðir opnist óvænt og allur vandi verði úr sögunni. Nauðsynlegt sé að hefjast þegar handa við að vinda ofan af stöðunni svo hún verði ekki óleysanleg.  Ekki sé hægt að útiloka að miklu fyrr rætist úr markaðsaðstæðum og aðgengi að fjármagni en nú er talið. Ekkert bendi til þess og ef menn láta sér nægja að lifa í voninni verður of seint að bregðast við þegar ljóst verði að vonin rætist ekki.

Mánuði síðar sagði Davíð Oddsson þáverandi seðlabankastjóri, í viðtali við Channel 4 í Bretlandi, að staða bankanna væri mjög sterk.

Frétt á ruv.is

 

 

Eitthvað hefur þetta farið skakt ofan í mig...

... mér er flökurt.

Víst ertu kóngur klár.

Rolf Harris - youtube klikkar ekki

TAX-FREE

Hvað er málið með TAX-FREE þetta og TAX-FREE hitt.  Hagkaup tók upp á þessum ósóma fyrir einhverjum misserum síðan að auglýsa afslátt sem eitthvað TAX-FREE dæmi.  Fleiri hafa apað þetta eftir og nú síðast er Húsasmiðjan/Blómaval að baða sig í þessari vitleysu.

Hvers vegna er verið að auglýsa á þennan hátt?  Hvers vegna er ekki einfaldlega auglýst: 19,68% afsláttur af ákveðnum vörum, í stað þess að vera með þessa vitleysu?  Hvern er verið að reyna að blekkja?

Féll fyrir malbiki

Ég kom brunandi niður Kópavogshæðina, niður í Fossvogsdalinn.  Ákvað að koma mér af götunni og upp á göngustíg sem liggur samsíða Hafnarfjarðarveginum/Kringlumýrarbrautinni.  Tók í afturbremsuna til að hægja á mér.  Ekkert gerðist.  Tók þéttar á bremsunni og fann hvernig hjólið læstist og byrjaði að renna til.  Sekúndubroti seinna rann ég eftir malbikinu. 

Þetta var sæmilegasta bylta, en sem betur fer er ég nánast ómeiddur.  Sár á hné, hruflaður á sköflungi og dálítið stirður í mjöðm og baki.  Heppinn að vera í grifflunum, bar hendurnar fyrir mig og hefðu þær annars litið illa út eftir þetta.

Ég hlakka til að hjóla heim seinnipartinn. 

Hjólað í vinnuna

Það var ótrúlega ljúft að hjóla í vinnuna í morgun.  Ekki of heitt, ekki kalt og dálítil gola.  Sem sagt frábært hjólaveður.

Ég tek þátt í átakinu Hjólað í vinnuna, reyndar finnst mér það alltaf vera full snemma á árinu, mætti fresta því um viku eða tvær.  Byrja í kring um 15-18 maí og standa aðeins fram í júní.  Veðrið er yfirleitt frekar rysjótt um þessar mundir.  En það er án efa góð og gild ástæða fyrir þessari tímasetningu.  Fyrir daginn í dag hef ég lagt að baki rúma 250 kílómetra, þokkalega ánægður með það. 

Kristín fór í sveitina í gær, ásamt Steinu systir, til að taka þátt í sauðburði og öðrum vorverkum.  Máni fór ekki með í þetta sinn, vorprófin hjá honum hefjast í dag og standa út næstu viku.  Hver veit nema við reynum að koma okkur í eitthvað vatn um helgina til að bleyta færið og reyna við fisk. 

Reið - hjóli

Þar kom að því að hjólið fékk að finna almennilega fyrir því.  Ég dró það út fyrir rúmri viku og hef hjólað síðan.  Í vinnu á morgnanna og heim á kvöldin.  Ég verð að viðurkenna að það hefur tekið vel á að byrja svona skart - og ekki var rokið til að auðvelda þetta. 

Þetta er náttúrulega graf alvarlegt mál.... en fyrirsögnin og fréttin... alveg milljón

Vísir, 06. maí. 2009 14:19

Ákærð fyrir að sparka í höfuð á skemmtistað

Þrjátíu og sex ára gömul kona hefur verið ákærð fyrir að hafa sparkað í höfuð brotaþola með þeim afleiðingum að blæðandi sár myndaðist á vinstra eyra og vörum og bóglur mynduðust við hægra auga. Árásin átti sér stað á veitingastaðnum Kaffi Edinborg við Aðalstræti á Ísafirði í október á síðasta ári. Málið var þingfest í héraðsdómi Vestfjarða í dag.

Þess er krafist að konan verði dæmd til refsingar og greiðslu alls málskotnaðar. Auk þess gerir brotaþoli kröfu um greiðslu skaðabóta að fjárhæð 625.965 krónur.

Sjá: vísir.is

Fyrstu fiskar sumarsins

Jæja... fyrstu fiskarnir komir á land þetta sumarið.  Fékk sex fallega urriða í Kleifarvatni í dag.  Sleppti þrem og missti þrjá.

Þetta var í fyrsta sinn sem ég fer í þetta vatn.  Það var belgings vindur og í fyrstu leist mér lítið á.  Ég myndi eiga í stökustu vandræðum með að koma línunni út.  Þar sem ég byrjaði var þetta ekki gæfulegt hjá mér.  Var meira með fluguna í fanginu en út í vatni.  Færði mig úr stað og náði að haga því þannig að vindurinn stóð mér á hlið.  Þá gekk betur.  Fór eina umferð yfir smá svæði með Peacock, með kúlu.  Færði mig aftur og setti undir svarta og rauða með kúlu.  Sá fisk skvetta sér á yfirborðinu.  Kastaði í áttina að honum.  Taldi upp á tíu, rólega á meðan púpan sökk.  byrjaði að strippa og nánast um leið fékk ég nart.  Brá of seint við.  Kastaði aftur og um leið og ég byrjaði að strippa var hann á.  Fékk fínustu baráttu sem stóð í nokkrar mínútur.  Landaði tæplega þriggja punda urriða, vænum.

Þeir voru svo á í hverju kasti.  Landaði fimm til viðbótar, missti þrjá og sleppti þrem.  Fer þangað aftur fljótlega.  

Stefnumót við bleikjur - sem létu ekki sjá sig

Ég taldi mig eiga stefnumót á Þingvöllum í dag við nokkrar bleikjur, og jafnvel urriða.  En nei, þær sviku mig og urriðinn líka.  En gaman var þetta.  Þó veðrið hefði mátt vera betra.

Við Máni vorum komnir upp á Þingvöll klukkan rúmlega ellefu.  Fórum beint í Öfugsnáðann og gerðum okkur klára.  Máni með nýju stöngina sem hann keypti í gær.  Töluverð spenna í okkur báðum.  Það var strekkings vindur og þannig séð ekkert skemmtilegt veiðiveður, en við létum það ekki stoppa okkur.

Við komum því við að hafa vindinn meira í bakið og á hlið.  Þannig tókst okkur að koma flugunum sæmilega út.  Svo var tekið hvert kastið á fætur öðru.  Ég fékk eitt nart, en það var svo naumt að ég náði ekki að setja í fast.

Drógum inn færið um klukkan hálf tvö.  Þá var þetta orðið gott.

Spurning um Kleifarvatn, Úlfljótsvatn, Meðalfells eða aftur á Þingvöll á morgun.  Svo er sunnudagurinn óskrifaður.

Roger Whittaker á fóninum.